كمال الشناوي يكشف سر خلافه مع أنور وجدي في برنامج تلفزيوني قديم

كشف الفنان الكبير الراحل كمال الشناوي عن علاقته مع الفنان انور وجدي وحقيقة الخلاف بينهم والتنافس علي لقب فتي الشاشة وذلك خلال استضافته في برنامج تلفزيوني قديم كان يقدمه الفنان هاني رمزي.

هاني سال الفنان كمال الشناوي عن نوادره مع الفنان انور وجدي فقال : أنور وجدي طبعا كان فتى الشاشة الاول قبل ما أظهر ، مكنش لسه انتج ولا أخرج ، كان ممثل فقط ، بس كان كبر على الادوار اللي بيعملها ساعات كان يطلع لسه في الجامعة  فمكنش ممكن يصدقوه الناس، فلما ظهرت انا فهموني كتير جدا ان انا داخل منافس لأنور وجدي وهي دي الحقيقة.

 واضاف الفنان كمال الشناوي: كنت بعمل فيلم بيخرجه حلمي رفلة من الافلام الاولى ليا وكنت عايز اتكلم في التليفون ، التليفون ده كان فيه عِدة تحت والعِدة التانية فوق في أوضة الانتاج رفعت السماعة فلقيت حلمي رفلة فوق بيتكلم في التليفون مع أنور وجدي وأنور زعلان جدا وبيقول لحلمي"بعد الزمالة والصداقة والعمر ده كله تجيب واد من الشارع كده وتعمله 3 أفلام" الله ده الواد اللي من الشارع ده انا يا نهار أسود رحت قافل السكة.

ومن ساعتها اتعقدت من أنور وجدي فلما دخل في الانتاج كان يطلبني مكنتش اسأل فيه فيروح منزل أعلان في الجرايد انه هيعمل فيلم وينزل اسمي في الاعلان فأخلي المحامي بتاعي يبعتله جواب بعلم الوصول انه بيحط اسم كمال الشناوي بدون ما يكون فيه عمل او عقد بيننا ، يقوم أنور يطلبني في التليفون أهرب منه الا ان في الاخر واحد صحفي سألني عن رأيي في أنور انا طبعا شايل منه انا مش واد من الشارع ابدا وكلامه جرحني فقلت للصحفي "والله أنور وجدي بيعتبرني منافس ليه لان انا أصغر منه سنا وأقدر أعمل ادوار هو ميقدرش يعملها" وغلطت غلطة وحشة اوي اني قلت عنه "هو كرشه قدامه وانا معنديش كرش" .

ويكمل الفنان كمال الشناوي: المهم اتكتب الخبر ده وأنور وجدي بالصدفة قابلته في ستوديو مصر قالي "انا بعتلك كتير على أساس انك تيجي تشتغل معايا وانت رافض حتى مبتردش عليا وأحب أقولك حاجة قول عليا اني ممثل رديء او وحش او منفعش في التمثيل لكن تقول كرشي قدامي ده كتير" قلتله "انت قلت لحلمي رفلة انك جايب واحد من الشارع ، انا مش من الشارع فأنا رديتهالك" .. قالي "لأ انت تقول عليا أي حاجة بس متقولش كرشي قدامي لان انا زمان كنت بقسم ساندويتش الفول نصين أفطر بيه واتعشى بيه ، الجوع ده انا عشته انت معشتوش ، كنت بحط ايدي على بطني أحس بعضم بطني من الجوع ، قول عني أي حاجة بس متقولش كرشي انا كل ما بشوف كرشي قدامي كده بحس ان خلاص راح الجوع ، راح الفقر" انا بكيت وخدته بالحضن وبوسنا بعض وانتهى الخلاف بينا للابد.