بعد أزمة ميكب آرتيست المحلة.. دينا فؤاد: «جاحدة ومعندهاش قلب»
علقت الفنانة دينا فؤاد على واقعة الميكب آرتيست وذلك عبر خاصية الستوري على صفحتها الرسمية على موقع التواصل الاجتماعي للصور والفيديوهات “إنستجرام”.
وكتبت دينا فؤاد: "الميكب آرتيست اللي خلت عروسة تغسل وشها عشان مدفعتش الألف جنيه الفرق، دى مش إنسانة دى واحدة جاحدة ومعندهاش قلب، حتى لو البنت كذبت ومقالتش إن هی العروسة عشان مش معاها حق الميك اب السواريه، كان المفروض تبارکیلها وتسيبيها تكمل فرحتها و اعتبريه خير عملتيه يا غبية، مش تقوليلها يا تدفعى الفرق یا تغسلی وشك، إيه الغل و السواد ده، إزاى جالك قلب تكسرى خاطرها كده، ربنا يتولاكي برحمته ويعينك على قلبك الاسود ده".
وكانت عروس المحلة روت تفاصيل الواقعة، في تصريحات صحفية، أنها استقرت على حجز ميكب الخطوبة مع ميكب آرتيست تدعى نورا، وعندما سألت عن الأسعار الخاصة بها على الصفحة الرسمية لها، كان سعر الميكب السواريه مناسبا للعروس وهو 450 جنيها.
وقالت عروس المحلة: «أنا كنت عايزة ميكب بسيط، وكان السعر ده مناسبني عشان كدا حجزت، أنا مضحكتش عليها في حاجة، وبعد ما خلصنا، معجبنيش لأن المساعدة عملتلي ميكب أوڤر، بس متكلمتش».
وعلقت على الجدل المثار قائلة: «أولا أنا بجد بشكر كل الناس اللي دافعت عني، ثانيا اليوم عدي على خير وأنا نزلت من عندها قلت في سري بس حسبي الله ونعم الوكيل، وروحت البيت وعملت ميك اب لنفسي واتصورت سيشن، وكانت الخطوبه حلوة والموضوع أصلا نسيته ومكنش في بالي خالص».
