رأفت عبد العظيم يكتب:  سنة الحياة

زمان أيام الشباب كنت لما أقف أستنى الأتوبيس أفضل رايح جاى على المحطة .. ولما الأتوبيس يجى بعد ربع ساعة أو أكتر أحس أنه عدى ١٠٠ سنة ..
النهاردة وانا فوق الستين قاعد فى نفس المكان بالأنتريه قدام التلفزيون .. أقصى حركة لما أمسك الريموت وأغير القناة .. وأقصى نشاط إنى أقوم أعمل كوباية شاى ..  أو أقوم أدور فى المكتبة على كتاب اشتريته من معرض الكتاب اللى بستناه من السنة للسنة  ...
الشئ الوحيد المختلف لما يهل عليا أحفادى احس بسعادة غريبة .. ويرجع إحساسى القديم بالملل بمجرد مايقولوا باى باى ياجدو ..
أصعب شئ حياة تكون خالية من هدف نجرى وراه ونحاول نحققه .. ده بيخلى الحياة ملل فى ملل .. سامعك ياللى بتقول " دى سُنة الحياة " ...