الكاتب القدير رأفت عبد العظيم يكتب:  مكنش العشم

يُحكى أن إنسان فقير جداً عاش حياته كلها نايم فى الشوارع ويادوب لابس جلابية خفيفة فى عز البرد والمطر .. فى يوم شافه الملك  ..  صعب عليه جداً وقال له  :
__ إستنانى هـ أدخل القصر وأبعت لك واحد من الخدم ومعاه غطا علشان تتغطى كويس وتتدفى وتنام مستريح  ...
دخل الملك القصر ومجرد مادخل نسى الفقير ونسى يبعت له الغطا  .. تانى يوم خرج الملك لصلاة الفجر لقى الفقير مات .. مات من شدة البرد مع أنه عاش حياته كلها مستحمل البرد والمطر .. مات لأنه اتعشم فى الملك وأنه هـ ينفذ وعده وهـ يبعت له الغطا  .. العشم خلاه متأكد أن الملك مش هـ ينساه  .. استقوى بالعشم  .. ومن العشم ماقتل ..
ورأيى أن العشم مصدر من مصادر الحزن والألم  ..  ومن خلال تجاربى فى الحياة عرفت وتأكدت أن الحياة والظروف والمواقف بتغير الناس .. فـ بلاش من العشم عشان منزعلش ولا نتألم .. اقفلوا باب العشم بالضبة والمفتاح ترتاحوا .. لا حد يزعل منك ولا تزعل من حد ...
اتعشموا فى الله وبس ...