ريهام سعيد: «إنتوا ظالمين بتمشوا بكلمة من غير ماتشوفوا ولا تفهموا»
أثارت الإعلامية ريهام سعيد الجدل على مواقع التواصل الاجتماعي بعد المنشور الذى نشرته عبر صفحتها الشخصية علي موقع التواصل الاجتماعي "فيسوبك".
ونشرت ريهام قائلة: "أقسم بالله كل حرف هاكتبه صادق و من قلبي ،انا حسه ان انا هاموت قريب عشان كده هابعد عن السوشال ميديا عشان اقعد مع اولادي اكتر وقت ممكن خصوصا ابني الصغير".
وتابعت: "يمكن سحر يمكن اكتاءب و يمكن حقيقي، غالبا احساس الظلم كان بيقتلني بالبطيء في يوم من الايام الدنيا قامت عليه عشان تعلب اما المعراج و انكارها عادي".
واستنكرت: "تامر أمين يغلط في الصعايدة قاصد او مش قاصد يتوقف ٣ شهور لكن انا أعمل أكبر حمله للسمنة وأعالج آلاف من السمنة وعمليات ببلاش ويفتروا عليه ويقولوا إني قلت ان ريحتهم وحشة واتوقف سنة، فتاة المول ولا تحرش ولا نيلة وأجيب فيديو وهي معاه محدش يشوفوا واتحاكم وادفع الي ورايا واللي ادامي لسما المصري عشان تتنازل لان هي الي زقاها عليه وغيره وغيره وغيره".
وتابعت: "كفايه اننا عالجنا اعداد مهوله من الشباب من المخدرات ورحت اماكن خطر جدا عشان اوعي الناس بدل ما اتكرم الاقي نفسي نايمه في اوضه متر في متر مع تاجره مخدرات، البرنامج يتوقف اطفال تموت و مدرسه ذوي الاحتياجات الخاصه الي فاتحنها تتقفل و تطلع ريهام افاقه و كدابه ،لو فضلت احكي هاحكي كتير بس انا موجوعه ومش قادره احكي انتوا ظالمين بتمشوا بكلمه من غير ماتشوفوا ولا تفهموا.
واستطردت ريهام قائله :عندي كلام كتير اقوله علي كميه مواقف فيها ظلم رهيب، لو مت انا مش مسامحه مش مسامحه اي حد قال عليه كلمه واحده مش حقيقيه او علي السمع، مش مسامحه اي صحفي كتب عني كلمه ظلم مش مسامحه اي واحد كتب كومنت موت بيها اطفال القلب، كفايه ان اي حاجه الاعلام بيتكلم فيها دلوقتي انا متكلمه فيها من عشر سنين".
واستكملت: "هانزل قبري مش مسامحه هاني عزب و لا ايمن سليم ولا ريم ولا بسمه و محمد راضي وعلاء الكحكي وليد مصطفي و محمود مملوك واحمد عبد العزبز وجورج قرداحي و كتير غيرهم مشً مسامحه ولا هاسامح، مش مسامحه الي بتسحرلي كل شويه مش مسامحه حسن شاكوش واللي عمله في اولادي، مش مسامحه اي حد ساهم في خراب بيتي و ضياع مجهود سنين ومش مسامحه اي حد انا معرفوش ضدي و بيحاربني و انا مش عارفه".
وأكدت: "المهم إني أجهز للقاء ربنا أعوض الصيام واصلي كتير واتصدق وادعي ، ادعولي انتوا كمان ربنا يغفرلي".
وتساءلت مستنكره: "ريهام بتجيب مشاكل طب وراحت فين المشاكل لما قعدت في البيت ؟ ما هو الي فيه طبع مابيغيروش والا عشان الي كانوا بيعملوا المشاكل اتهدوا لما اعتزلت ؟ عشان انا مش علي الشاشة مليش قيمه و مفيش مصلحه قد ايه الناس وحشه. كلمت ناس كتير يساعدوني أحقق حلمي وامثل مش عايزه اقولكوا الرد وناس ياما وقفت جنبهم، كل دور اعمله المخرج يقول لي انه هايكسر الدنيا بس هي ماشيه بالشطارة".
وتابعت: "أنا عايزة اقولكوا الي اللقاء يمكن لمًا اخف لو عيانه يمكن لما اتعالج من السحر لو مسحوره يمكن في الجنه باذن الله لو مت، ماتظلموش حد لان انا بعد ما تعبت اوي اوي ظلمتوني ايوه حتي لو ليه اعداء انتوا ساعدتوهم".
ووجهت ريهام رساله قائلة: "آخر حاجه هاوجهها للريس انا لو مت وصيتي اولادي يعرفوا انا حققت و عملت ايه لان اكيد حضرتك مش عارف برضو انا اولادي اتعذبوا ورايا في المحاكم و القضايا انا ابني كان عنده شهرين زارني في السجن انا بهدلت اهلي معايه عشان ولا حاجه كنت فاهمه اني هاصلح الكون".
كما اعتذرت قائله: "أنا آسفة إني نجحت انا اسفه اني كنت عايزه كل الناس تعمل خير انا اسفه اني معملتش علاقات تسندني جوه او بره مصر، خساره المجهود الي راح بدون تقدير لكن اجري باذن الله عند ربنا . ماتوجعوش حد تاني إحساس الظلم مميت".
وأنهت ريهام رسالتها قائلة: "إحنا كنا البرنامج رقم واحد في المشاهده في الوطن العربي عشر سنين و السابع علي العالم وتعبنا اوي اوي اوي اوي قدر الله و ما شاء فعل حقي عندك يا رب ، في الاخر السيره اهم من السمعه لان السمعه دي الحاجات الي بتسمعها وماشفتهاش وهي مش حقيقه لكن السيره دي الي موجوده في كل بيت فيكي يا مصر دي سيره معاملتك للناس و الحاجات الي ربنا جعلني سبب اني اعملها و هو ده المهم، بعد ما اموت ماتقولوش دي بتمثل انها ماتت زي ما كل مره كنت بعيا فيها الصحفيين كانوا بيطلعوني كدابه حسبي الله و نعم الوكيل".
