احتفال رواد السوشيال ميديا بذكرى ميلاد المخرج محمد خان

فى ذكرى ميلاد أصدق من قدم مصر فى السينما "محمد خان"، ستظل سينما خان هى الاكثر توهجا وابهارا فى التاريخ السينمائي المصري، لذلك يحتفل صفحات التواصل الاجتماعي بذكرى ميلاده خلال نشر أهم أعماله الفنية واراء و مواقف عدد من النجوم معه.

سر تفرد تجربته السينمائية فى نظري ل4 اسباب هم :

1: البساطة: خان هو المخرج المصري الوحيد اللي كل افلامه قدم فيها جوهر الفن انه يقدم الواقع بشكل مسلي وممتع، لا بيطلع يحزق بقضية يصرخ بها فى وشك طول الفيلم ولا بيقدم افلام سريالية يتغطرس بها على عقلك ودماغك، افلام خان فيها كل حاجة، المشاهد العادي اللي عايز حدوتة حلوة وخلاص هيلاقيها موجودة، المشاهد المتعمق اللي عايز اسقاطات ورمزيات وكادرات حلوة هيلاقيها موجودة برضو وال2 هيخرجوا من الفيلم مستمتعين

2: ادارة الممثل: ان مخرج يكتشف ممثل جديد ويفجر موهبته ده شىء عادي لكن العظيم انه يفجر موهبة ممثل تقيل اصلا ونجم من قبله، فهتلاقي أعلى اداء تمثيلي لعادل امام فى "الحريف"، أعلى اداء لاحمد زكي فى "زوجة رجل مهم"، أعلى اداء لفاروق الفيشاوي فى "مشوار عمر"

3: الشاعرية: فى كل افلامه بيقدر يخلق رومانسية فى أي ظرف وبأي شكل وعمرك ما هتحس انها مفتعلة لدرجة انه فى نهاية "خرج ولم يعد" دخل "جاموسة" فى الكادر بين عطية وخوخة وهما ماسكين ايدين بعض وفضل محافظ على عذوبة ورومانسية المشهد

4: البهجة: مهما كانت درجة كآبة الحدوتة لازم يفصلك كمشاهد عن كآبتها لثواني بصوت مبهج او رومانسي باصوات عبدالحليم، ام كلثوم، ليلى مراد وسعاد حسني رحل جسد خان لكن روحه ظلت وستظل حية فيما تركه من تحف سينمائية