تامر حسني ينشر صورًا من كواليس تصوير فيلمه الجديد

نشر الفنان تامر حسني، عبر صفحته الشخصية بموقع التواصل الاجتماعي "فيس بوك"، صورًا يكشف من خلالها، كواليس من فيلمه الجديد.

وقال تامر حسني معلقاً علي الصور: "مساء الهنا على اغلى ناس على قلبي انا دي صور من اول يومين تصوير لفيلمنا الجديد ( بحبك ) طبعاً في ناس هتقرأ اسم الفيلم بحبِك و ناس هتقرأها بحبَك دا طبعاً مقصود عشان في درامة الفيلم هنبحث طول الوقت عن مدى صدق كلمة بحبِك من الرجل للأنثى و بحبَك من الأنثى للرجل في احداث فعلاً محيره جداً".

وتابع: "الفيلم أكيد فيه ضحك بس في إطار رومانسي بحت مش موجود بقاله كتير، اتشرفت بمشاركة نجمة اليوم والمستقبل الجميلة هنا الزاهد ومبسوط إني أول من اكتشفها في بداية حياتها وفي الفيلم دا بكتشفها تاني وبقدمها بشكل جديد عليها وعليكم ومبسوط جداً لمشاركة حبيب قلبي نجم الكوميديا الكبير حمدي المرغني اللي هيعمل ان شاء الله شغل رهيب في الفيلم كعادته الجميلة وللأسف لسه مصورش علشان انزل صوره بس في اول يوم تصوير له ههريه صور".

وتابع: "وانتظروا بعد ايام انضمام نجمه جميله مميزه من نجوم المستقبل اللي هيكون ليها مستقبل كبير ان شاء الله ، وفرحان جداً بإنضمام الفنان الموهوب اوي مدحت إسماعيل اللي عامل دور زي العسل وربنا يكتبله فيه كل النجاح ويكرمه ويكرمنا معاه، الفيلم من انتاج حبايب قلبي واصدقاء العمر سينرچي أحمد بدوي، تي ايتش برودكشن حسام حسني، سكاي ليميت أحمد الدسوقي".

يذكر أن آخر أعمال تامر حسني فيلم "مش أنا"، الذي تدور أحداثه حول شخصية حسن الذى يُصاب بصدمة غريبة تفقده السيطرة والتأقلم على يده، فيصبح مع مرور الوقت ضحية العديد من المواقف الصعبة والمحرجة، بينما يرفض كل من حوله تصديق حالته.

أبطال فيلم "مش أنا"

فيلم "مش أنا " سيناريو وحوار وبطولة تامر حسنى وإخراج سارة وفيق وشارك في بطولته حلا شيحة وماجد الكدواني وسوسن بدر وشيرين وحجاج عبد العظيم بجانب عدد من ضيوف الشرف، منهم إياد نصار و محمد عبد الرحمن وعصام السقا.